中環出更：粉飾店舖周國豐搵「英女王」
社交界名人周國豐（Brandon）本身做律師，去年兼做英國及法國床上用品代理生意，仲愈做愈起勁。日前卓妮喺中環太子大廈遇到Brandon，佢走入至愛嘅一間歐陸式家居精品店，搜羅心水貨品，未幾見佢買咗一個英女王人像嘅相架，原來係要嚟布置佢間床上用品店。
當日下午兩點幾鐘，身穿西裝及格仔恤衫嘅Brandon，單拖步進太子大廈二樓一間精品店購物。記得呢間商店之前位於置地廣場，後來搬咗去太子大廈，Brandon都依然照跟，認真專一。店主見Brandon來到，立即殷勤款待，雙方傾到雞啄唔斷。一向對英國事物情有獨鍾嘅Brandon，仔細挑選店內貨品，未幾就睇中一個連相片嘅相架，相中係英女王人像，佢旋即簽卡付款，滿足地離開。
代理英皇室床上用品
Brandon話，個相架係諗住用嚟放喺佢間床上用品店，粉飾吓陳列室。咁點解要揀英女王人像呢？因為佢間店舖專營英國皇室御用嘅床上用品，用英女王來襯托最適合不過喇。Brandon透露，個相架連相片，只售一千多元，認真抵買。卓妮又見到佢手挽住一個有英國國旗圖案嘅環保袋，佢話每逢去運動，都會自備環保袋裝運動衫。
暑假又到，Brandon話下月中會同太太及兩個囝囝遊日本沖繩四天，享受陽光與海灘。佢話早前經常外出公幹，所以放假唔想去得太遠，所以近近哋揀咗沖繩，同囝囝游吓水，享受家庭樂。
卓妮