古人話：不患寡而患不均，不患貧而患不安。意思好簡單啫，社會不公，分配不均，必然導致亂象叢生。香港正正係咁，簡直乜都患齊，既患不均亦患不安，搞到貧富懸殊、矛盾尖銳，想和諧都幾難！
講到不均同不安，莫過於港府嘅房屋政策。本港樓價長升長有，當局為咗安撫無殼蝸牛，揚言將房屋政策作為施政重中之重，仲話要寸土必爭添。事實又係點呢？當局一方面強推新界東北發展計劃，又要徵地，又要拆遷，導致居民怨聲載道；另一方面又唔敢收回私人會所用地，放任富豪權貴霸地玩樂，正一係嫌貧愛富，欺善怕惡。
就以粉嶺高爾夫球場嚟講，佔地一百七十公頃，足可興建十六個彩虹邨，但目前只供二千個會員享用，你話係咪離譜吖？本來呢，收回高球場土地作房屋發展等用途，既唔使巨額賠償，又免卻村民拆遷之苦，一家便宜兩家着，點知當局諸多推搪，初時聲稱租約未滿，被踢爆講大話後，又改口稱研究需時幾年，講嚟講去無非敷衍民意。
除咗粉嶺高球場之外，全港仲有七十幾幅私人會所土地被政府以象徵式租金批出，呢類富豪俱樂部使用率極低，唔少仲係位於市區黃金地段，只要政府收番土地，根本不愁無地建屋。可惜吖，呢個政府最叻講一套做一套，其中五十五幅私人會所用地租約早已到期，當局唔只冇打算收回，反而計劃續租十五年，簡直係倒行逆施。
市民眼睛係雪亮嘅，「東方報業民意調查」顯示，大部分受訪者認為政府覓地捨易取難，係導致房屋問題不斷惡化嘅主要原因。對於政府一直強調無地起樓，三成二受訪者認為土地發展及規劃失敗；三成一人指政府無善用現有土地。至於政府以象徵式租金批出私人會所用地，三成八受訪者要求改變土地用途；三成二人直指土地資源嚴重錯配；兩成一人更認為殖民地政策已不合時宜。此外，四成二人指政府為私人會所續租無顧及公眾利益；兩成九人促港府檢討私人會所批地制度。
嗱，呢啲咪叫公道自在人心囉。前朝曾蔭權政府官商勾結，利益輸送，早已備受非議；現屆政府打着求變旗號上台，擺出一副不偏不倚嘅姿態，點知到頭來又係一擔擔。新政府上台一年後嘅今日，樓價依然居高不下，無殼蝸牛依然望樓興嘆，劏房居民依然水深火熱，所謂重中之重、寸土必爭，根本係廢話。
黃台之瓜，何堪再摘。咪話功夫茶唔提醒吖，現屆政府施政混亂，民望低企，本已寸步難行，如果繼續喺土地問題上偏幫富豪權貴，盞進一步撕裂社會，激化仇富情緒，到時一定冇運行㗎！