政府為新界東北發展提出向村民收地，反而引發普羅大眾要求政府收回佔地一百七十公頃嘅粉嶺高爾夫球場，由於入得呢個場打波嘅人非富則貴，平民百姓根本難以進入，所以呢場粉嶺高球場收回戰，又被譽為「一比九十九民意戰」，高球會一直處於下風，據聞佢哋直至上星期先醒覺殺到埋身，最近已四處物色公關幫佢哋打好呢場硬仗。
其實香港不乏高球場，但又以粉嶺呢個場最具國際標準，有成五十四個洞咁多，大部分打波嘅都係身家最少以億計嘅本地富豪，而管理層就以外籍人士為主。九七回歸前，呢班洋人可以直接搵港督傾偈，續租條件唔啱傾到啱，直至回歸後政府都繼續批租，令佢哋無晒危機感，今次鬧出收地風波後，佢哋仲以為政府講下笑。
直至上星期，佢哋先發覺呢單嘢有好大陣（火羅）味，隨即諗住搵啲富貴會員幫手，但似乎無邊個富貴會員肯上身，反而叫高球會快啲出外搵公關仲好，據聞高球會管理層上星期開會傾過呢單嘢，已一致決定搵公關高手救亡，嚟個輿論反擊戰。但呢場仗一啲都唔易打，要扭轉高球會喺市民眼中並非富豪俱樂部，邊有咁易。