政情：今日你上鏡：問「彬」有幾愁？

上月初賽馬會爆出多匹馬嘅尿液樣本含禁藥「瘦肉精」，後來發現源頭來自馬會提供嘅飼料，其中觀塘區議會主席陳振彬（Bunny）嘅愛駒「傳奇快車」，上周四都被馬會褫奪「十八區盃」嘅冠軍資格，連頭馬獎金一併收回。咁啱當日我哋見到Bunny一支公現身中環街頭，見佢翹埋對手喺身後，不時望天打卦，又低頭而行，若有所思，莫非係為咗呢件事而憂心？我哋後來打電話畀Bunny，佢話同練馬師研究過後，認為瘦肉精件事責任在於馬會，決定提出上訴。佢又話，自己會一如既往抱住平常心，尊重馬會裁決，亦會照捐錢畀公開大學喎！