政情：黃錦星還「着過」二手衫
堆填區撥款申請日前喺立法會通過終止辯論，意味住議案暑假前通過無望，但環境局局長黃錦星（星星）尋日轉個頭又出席活動，教小朋友唔好浪費地球資源之餘，仲為自己許下承諾，即日起將活動大會提供嘅Ｔ恤，着完之後「回饋」物主！哇，星星慳同環保係人都知，但估唔到開始走火入魔，着過嘅二手臭衫都畀番人哋咁唔衞生？
難以循環再用
星星出任局長一年，年中出席大小活動都會着住主辦單位提供嘅Ｔ恤，但星星覺得啲Ｔ恤多到當睡衣都着唔晒，數量之多實在多過自己需要，決定即日起將着過嘅Ｔ恤「回饋」番畀主辦單位。之不過平日去二手店買衫尚且係經專人洗燙，乾淨企理，星星將自己着過唔要嘅臭衫物歸原主，叫人哋點處置件衫好？
雖然星星事後強調會洗番乾淨先歸還，但其實好多活動Ｔ恤都係一次性或者標示咗年份，就算主辦單位明年想循環再用都未必用得着，對方「硬食」星星件二手衫仲要搵地方收起或棄置，所以話星星其實只係將廢物源頭由佢屋企改為主辦單位寫字樓，同調換堆填區位置一樣，問題都係未解決。