政情：梁紀昌邀觀課 教協迴避
一年前無視外界冷嘲熱諷，堅持喺學校推行國民教育科嘅鮮魚行學校校長梁紀昌，尋日上電台節目總結國教風波事件。梁紀昌話校內推行德育及國民教育科一年，所有課程內容都係由校方自行製作。當時唔少傳媒批評鮮魚行強推洗腦教育，梁紀昌為咗證明學校唔會藉國教科洗學生腦，都會不時邀請家長、傳媒同其他學校老師去鮮魚行觀課，當中包括教育界立法會議員葉建源。但點知對方就以「唔得閒」為由，請梁校長食咗一個酸溜溜嘅檸檬。
葉建源「唔係太方便」
梁校長話，雖然上學期有唔少家長同傳媒前來觀課，但事過境遷後，下學期竟然一個嚟觀課嘅人都無。梁紀昌又話，葉建源婉拒邀請後，佢都有問對方其他教協理事得唔得閒，點知葉建源就用「唔係太方便」回絕梁校長要求，令佢覺得對方無心了解國教科實際教學情況。
葉建源解釋，該校逢星期五下晝上國教科，時間同立法會開會相撞，而其他理事都因為要教書，所以先至唔得閒去觀課，佢強調教協並唔係有心迴避。佢又話自己對國教科甚有興趣，如果下學年時間許可，佢一定會抽空到場觀摩。