政情：消防現眼報 總部後欄失火

身為執法部門嘅消防處救人救火係應有之義，不過近年烏龍百出嘅消防應做嘅唔做，唔應該做嘅就大大陣仗。

話說消防上月底聲稱收到電郵投訴，高調派人到東方報業中心調查，要求進入屬於傳媒核心嘅伺服器房，最後證實大廈消防系統運作正常，投訴電郵純屬子虛烏有。

內部發14頁通告「解毒」

殊不知事隔半個多月後，消防「剃人頭者，人亦剃之」，位於尖東嘅消防總部大廈，佢嘅伺服器房一支光管過熱繼而火牛冒煙致火警，事後搞到要浪費人力物力去撲救，最高峰現場有八輛消防車，連處長陳楚鑫等高層都要緊急疏散到地下停車場，認真係笑大人哋個口，其實消防要查都應該查吓自己先啦。

不過咪以為消防會「經一事，長一智」，最近甩甩漏漏事件一單接一單發生嘅同時，更有消防高層披甲上陣以「重要訊息」為題，發出長達十四頁內部通告，內容係死撐消防巡查報館行動係同打壓言論自由「風馬牛不相及」，之後繼續本末倒置將近日接二連三嘅老貓燒鬚事件塗脂抹粉，講到尾都係辯駁多多，完全睇唔到有乜自省能力。

話時話，俗語都有話「錯就要認，打就要企定」，消防「現眼報」連部門心臟地帶都失火，安全標準之低劣認真諷刺，消防有時間出外搞搞震甚至係多管閒事，倒不如花啲時間檢視內部混亂情況，避免再鬧出消防心臟地帶失火嘅國際大笑話，否則登上國際傳媒嘅頭條新聞，到時消防真係開幾多條喉去「滅火」都徒勞無功喇！