中環出更：啟剛打籃球 不忘陪母打羽球
近日家庭同公職兩頭忙嘅青年聯會主席霍啟剛，前日以運動裝現身祖苗文化交流中心一個內地體育訓練團啟動禮，並即場同兩位星級籃球員切磋球技。啟剛笑言，自己對籃球唔係咁在行，但自爆讀書時已經鍾意打羽毛球，莫非係受到媽媽朱玲玲嘅影響？啟剛又話，雖然依家好忙，仍會間中抽時間同媽媽打番場波，認真有孝心。
青聯於上月底舉辦嘅「鋒雲」論壇，有朝霆創辦人謝霆鋒及阿里巴巴創辦人馬雲做講者，反應甚佳。啟剛話，第一次搞論壇就咁成功，令佢相當有壓力，依家已經急不及待同一班青聯嘅兄弟姊妹開會，齊齊積極「腦震盪」，訂下未來一年嘅鴻圖大計，期望之後每一個活動，能夠愈辦愈出色。
派老婆幫青聯宣傳？
啟剛笑言，必要時會出動埋「王牌」做宣傳喎。佢張「王牌」係乜？唔使講都知，咪就係太太郭晶晶囉！唔知佢遲吓會否帶埋「小啟剛」出嚟加大宣傳力度？講番個訓練團，該中心理事長盧繼祥話，趁住北京奧運會五周年舉辦呢個訓練團，希望提升京港兩地青少年嘅運動水平。