中環出更：甄韋喬行善實現故友「願景」
疾病無情，但人間有愛。「清潔王子」菁英會副主席甄韋喬（Mickey）牽頭成立嘅「願景基金會」（VQ）已踏入第三年，服務逾一萬五千名市民。原來該會最初係由Mickey一位朋友建議創立，豈料尚未正式註冊，友人已不幸離世。Mickey深感悲痛之餘，繼續咬緊牙關「湊大」該會，決心將友人嘅愛心延續下去。
日前該會舉行就職典禮，Mickey與一班兄弟姊妹齊現身。今屆理事會精英雲集，包括來自國際青年商會（JCI）、獅子會、傑出青年協會等團體嘅年輕才俊。Mickey話，希望藉此加強該會與其他慈善機構嘅聯繫同合作，擴大佢哋嘅服務範圍及影響力。
「二胡王子」義賣演奏門票
卓妮見到「制服天后」余嫿（Mary）同JCI香港總會前會長伍進超，佢哋都係該會副主席。當日Mary仲帶咗個特別嘉賓前來，就係「二胡王子」王憓（Ray），佢即場表演至耍家嘅二胡，全場氣氛即時變得好熾熱。Ray仲話，佢同爸爸王國潼將於九月中舉行演奏會，到時會捐出部分門票義賣，資助該會經費，大家齊聲叫好。
講到VQ嘅發展大計，Mickey話焦點係十面埋「服」大賽，推動市民行善。佢話，其實做善事唔需要用好多錢，該比賽就係鼓勵大家以最低成本，做出最有成效嘅服務，唔少學生、公司及民間義工隊都落力組隊參與，佢希望將比賽規模擴大至全港。