一年容易又放榜，聽日係第二屆中學文憑試揭曉嘅大日子，對於莘莘學子嚟講，呢個係決定命運嘅時刻，有人期待，有人焦慮，有人興奮，有人擔憂，有人迷茫，有人徬徨，箇中滋味相信只有過來人至可以體會。
正所謂，知識可以改變命運。學生要考試，入大學要過關，呢啲本來好正常，全世界都係咁，香港學生之所以特別痛苦特別徬徨，皆因大學學位嚴重不足，大有千軍萬馬爭過獨木橋之勢，所以每次會考或文憑試放榜，都係歡喜者少失落者多。呢，有項調查發現，以十分為最高，受訪文憑試考生嘅壓力指數平均為六點七分；七成半受訪者視文憑試為造成壓力嘅洪水猛獸，當中近四成屬高壓力群組添。今時今日嘅香港，你有壓力，我有壓力，學生更加有壓力。
港府吹水唔抹嘴，揚言要發展教育產業，其實純屬大隻講，大學學位僧多粥少，莘莘學子望天打卦，試問點樣發展教育產業吖？就以今年嚟講，參與中學文憑試嘅考生超過八萬人，比舊年多咗一萬，而大學資助學位只有大約二萬個，即係話絕大部分考生無緣入大學，好多學生就算考獲入讀大學嘅資格，亦要等運到，你話唔徬徨就假。教育界人士估計，今年考生要取得五科共二十一分至有望喺聯招中得到學位，比舊年仲要難。唉，大學門檻一年高過一年，競爭一年大過一年，學生壓力唔爆煲至奇喇！
港產官僚一味講風涼話，聲稱求學唔係求分數喎，問題係分數唔夠就入唔到大學，咁又點解釋吖？即係咁，家庭條件好嘅學生，就算入唔到本港大學，仲可以去外國讀書，佢哋係唔使擔心冇出路嘅，最徬徨係嗰啲既入唔到本港大學又冇能力留學嘅學生，前路茫茫，唔知何去何從。本來呢，名落孫山嘅考生可以選擇讀副學士、高級文憑等等，弊就弊在當局監管不力，院校見錢眼開，濫開課程超收學生，搞到副學士及高級文憑課程泥沙俱下，良莠不齊。
嗱，嶺南大學旗下兩間自資院校舊年被踢爆超收學生一點八倍，結果設施嚴重不足，教學時數縮短，簡直匪夷所思。學校淪為學店，將教育當一盤生意咁做，教學質素毫無保障可言，學生學無所用，反而孭上一身債，呢啲所謂專上教育，根本就係誤人子弟至真。
講到底，真正嘅洪水猛獸唔係文憑試，而係港府混亂不堪嘅教育政策。少年強則國強，少年智則國智，睇教育就可以知道未來，港府唔肯提高教育投資，唔肯增加大學學位，香港明天又點會更好吖！