江門鶴山興建核燃料處理廠風波，激起當地逾千居民上街抗議，結果江門市政府喺一日之後就跪低取消建廠。江門人聞核色變，但白鴿黨立法會議員涂謹申尋日又話好關注，仲搞到去信特首辦，話對特區政府冇主動了解呢件事感到失望，要求政府以後要主動啲喎。人哋已經取消計劃啦，香港方面先開始行動，呢啲係咪叫賊過興兵呢？
江門市繼周五有逾千市民遊行後，尋日朝早又有人聚集、準備展開第二日抗爭，但江門市政府已經腳軟，拿拿聲宣布取消核燃料處理廠嘅計劃。阿涂話歡迎江門市政府嘅決定，如果佢哋堅持興建核燃料處理廠，對香港有好大影響，因為香港同江門嘅距離唔遠，一旦當地廠房發生任何污染，咁香港同珠三角嘅空氣、水源甚至食物供應都會受影響，冇可能置身事外。
阿涂除咗寫信畀特首辦，講明係冇任何資料評估前已經反對計劃，同時又對特區政府至今冇主動了解件事感到失望，仲認為日後內地政府如打算興建任何核燃料加工廠，港府應該第一時間向內地索取資料，做風險評估甚至做公開諮詢。佢一連串要求，好多都觸及粵港聯席會議嘅範疇，睇怕都有排搞喇。