政情：陳克勤歎最「牛」豆腐花
立法會議員周不時要出席大大小小嘅地區活動，去得多自然知道邊度有好嘢食。好似陳克勤咁，對大埔區就熟晒架步，就連去到林村許願樹出席活動，都要去「牛記」食番碗豆腐花先至捨得走，肚餓時更加會整多個碎牛治。佢話林村入面每一棵樹都至少有幾百年歷史，想當年遊客喺許願樹拋完寶牒後，都例必去食碗豆腐花，牛記成為一眾街坊吹水打牙骹嘅好地方。
漁農界黨友最識食
克勤話，唔少黨友都係識食之人，當中最識食嘅就係兩位漁農界立法會議員。
佢話黃容根當年仲做緊立法會議員時，會邀請大家去三門仔品嘗客家燜豬肉同客家梅菜蒸菜心，根哥更加會特別要求廚房用柴火燜豬肉，搞到佢哋食到停唔到口。
十八鄉事委員會主席梁福元都係客家菜捧場客，佢太太每星期都會喺屋企大顯身手煮番幾味客家菜，有時更加會用糯米酒或者花雕整黃酒雞，佢大讚非常惹味，食足幾十年都未覺得厭喎。