政情：愛港之聲疑美網絡攻擊
弊傢伙！愛港之聲唔見咗個facebook（fb）專頁，尋日仲要到旺角警署報案求助，指言論自由遭打壓，更懷疑專頁係遭受美國網絡攻擊添！愛港之聲召集人高達斌形容，今次事件係有計劃有組織嘅犯罪行為，所以必須報警，而成員陳廣文就解釋，近月已有四個撐政府嘅專頁因遭檢舉而被停用，相信今次專頁被停用亦不例外。
考慮轉用國產微博
有愛港之聲成員話，佢哋個專頁試過同一時間有三、四十人要求加入群組，有啲仲係來自世界各地。有成員仲猜測，美國副國務卿伯恩斯早前表示不滿港府處理美國中情局前特工斯諾登事件，不排除佢哋群組由有組織敵對分子背後策動，打壓支持特區施政嘅團體，仲話事件分分鐘涉及外交層面添！
咁點解外交事宜又會去警署報案呢？陳廣文話，佢哋正向fb了解，但暫未知真正原因，不過佢哋搵唔到fb喺香港嘅辦公室，所以最想警方可以善用與大公司嘅關係，幫佢哋同fb聯絡喎。佢仲話，嚟緊會考慮再開設專頁同網上支持者聯絡，但就未必會再揀fb呢啲美國貨喇，所以或者會轉投國產開微博。