政情：重提骨灰龕 自毀「高」民望

高永文尋日出席立法會議員陳恒鑌（Ben）位於葵青嘅議員辦事處開幕時，已不時提到今屆政府遇到唔少困難，仲話做嘢唔可以只看眼前，要為未來四至五年着想。之後佢會見記者時，就入正題重提興建骨灰龕計劃，話每年出生率同死亡率相若，所以就算大家唔想喺屋企附近見到骨灰龕，但呢個累積咗十幾二十年嘅問題始終都要解決，強調今屆政府要努力落實上屆政府嘅建議，喺全港十八區興建骨灰龕。

高永文放口風試水溫？

其實上屆政府提出在十八區興建骨灰龕，只係「貪曾」前特首曾蔭權爵士隨口噏嘅建議，一來有啲地區根本無法搵地建骨灰龕，同時惹來唔少區議員強烈反對，質疑政府將責任推卸畀區議會，最後因為批評聲音太大而不了了之。估唔到高永文尋日突然重提興建骨灰龕，莫非佢預見到有關問題會好似擴建堆填區咁，如果不公平處理，就會喺地區遇到極大阻力，所以預早放口風試吓各區嘅水溫？

不過，如果高永文就興建骨灰龕問題處理不當，隨時引發另一場政治危機，令政府添煩添亂，就算佢民望有幾高都好，正所謂「一子錯，滿盤皆落索」，民望一旦插水就好難翻身，到時就真係恨錯難返喇。講番尋日個辦事處開幕，高永文話阿Ben係佢嘅潮州「架己冷」同鄉，所以特別開心，而阿Ben就講笑叫在場街坊有咩頭暈身慶一定要早出聲，因為高醫生會飛身走埋去睇吓大家有冇事喎。