中環出更：仁愛堂率學生「非」常之旅
仁愛堂將於後日凌晨帶領二十三位學生考察東非肯尼亞，欣賞動物大遷徙並就文化及環保方面交流。尋日該堂舉行啟動禮，董事局成員齊現身為學生打氣。中華廠商聯合會副會長吳清煥都喺度，原來佢喺拔萃男書院升讀中四嘅囝囝吳政鋆（Clinton）都係團員之一。
Clinton遠赴東非，爸爸吳清煥話完全冇擔心，事關兒子從小已跟佢到處遊歷，至今年僅十五歲，已去過四十多個國家，亦曾以羽毛球亞洲錦標賽青少年代表出去比賽。Clinton之所以遠征東非，全因副主席羅台秦（Louisa）提名，咁啱佢丈夫、廠商會常務會董戴澤良都係拔萃男書院出身，梗係要支持師弟啦！
吳清煥囝囝將插男拔旗
Clinton話去肯尼亞，第一件事係要帶學校支旗，事關佢係該校首個參加類似活動嘅學生，校方希望佢到當地「插旗」留念，佢媽咪更特意買咗部相機畀佢影靚相。副主席陳婉珊（Clara）今年續任團長，佢話今次去熱帶地區，行李輕便好多，加上吸取上次遠征珠穆朗瑪峰嘅經驗，佢會做足防曬工夫。
隨團嘅仲有主席陳鄭玉而丈夫陳鑑光（Charles），佢話會帶耳筒及藍芽喇叭，與當地人民欣賞香港音樂，仲會帶公仔麵一齊食喎！卓妮見到總理徐永康帶埋太太Angela同十個月大嘅囝囝出席，佢年前去過肯尼亞，專程帶來佢影嘅動物相片，與學生分享旅程經驗。
卓妮