古人教落，便宜莫貪。前立法會議員鄭家富生人霸死地，舊年年中卸任議員後，仍長期霸佔立法會兩個車位，事件經本報踢爆之後，引起社會嘩然，喺一片質疑聲中，呢位過氣政客不得不靜靜雞駛走兩部車。唉，早知今日，何必當初，呢啲咪叫唔衰攞嚟衰囉！
最好笑嘅係，鄭家富自稱係新民主同盟立法會議員范國威義務法律顧問，可享職員泊車證，而范國威亦稱鄭係「議員團隊」一員，所以為對方申請泊車證喎。事實又係點嘅呢？本報查詢過立法會秘書處，得到嘅答覆係，泊車位只供議員、秘書處部門主管，以及議員同秘書處嘅訪客使用，其中訪客車位仲要預訂添，泊車時間亦只限四小時。簡而言之，立法會根本不設「議員團隊」車位，亦即係話，鄭家富同范國威都係講大話。
嗱，事實勝於雄辯，鄭家富霸佔車位證據確鑿，范國威涉嫌利益輸送無可抵賴，再狡辯盞愈描愈黑嘅咋。話時話，立法會車位屬於公共資源，任由過氣政客長期霸佔，而且仲係兩個位咁多，一來涉及濫用公帑，二來涉及利益輸送，除咗立法會有必要跟進之外，審計署同廉政公署係咪亦應該介入調查呢？經過貪曾七年之禍，本港官官相衞、官商勾結嘅情況已經非常嚴重，依家搞到連議員都其身不正，同過氣政客狼狽為奸，齊齊搵納稅人笨，當局再唔執正嚟做，香港好快就同內地睇齊，冇晒法治同秩序嘅喇。
講開又講，堂堂立法會好似無掩雞籠咁，有人超泊，有人玩升降機，有人博大霧亂用咪架，簡直無奇不有，七國咁亂。本來呢，立法會停車場安裝咗一個停車系統，登記車輛出入，點知有議員以該系統使用時不方便等諸多藉口要求停用，搞到該系統形同虛設，卒之咪變成無掩雞籠，經常出現超泊囉，講到底，呢班政客根本就係自私自利。呢，雖然鄭家富已駛走兩部車，但本報記者發現，尋日仍有議員超泊，證明立法會無規無矩。
正如古人話齋，己身不正，何以正人。立法會議員平時牙尖嘴利，對政府官員一啲都唔客氣，可惜有口話人，冇口話自己，佢哋自己亦唔好得去邊，最多係五十步笑一百步咋。就以鄭家富霸佔車位嚟講吖，如果呢件事發生喺政府官員身上，議員必定拍案而起，嚴詞譴責，甚至可能引用特權條例調查一番添。好嘞，依家捲入醜聞嘅係現任議員同過氣議員，立法會究竟點樣處理呢？咪話功夫茶唔提醒，今次事件唔只關乎立法會聲譽，亦關乎公眾利益，七百萬人睇住o架，千祈唔好又玩包庇吖！