政情：林煥光請真普聯食檸檬
政改方案遲遲未出台，但行政會議召集人林煥光（WK）近日經常發表對普選特首同立法會方案嘅睇法，仲講到有板有眼、愈見具體，仲話港府必須落實政改。真普選聯盟（真普聯）見WK咁有睇法，早前就邀請WK同一班真普聯成員交流吓，點知WK尋日就請佢哋食「檸檬」，回信婉拒出席之餘，仲叫真普聯成員有興趣可以睇吓佢啲文章，以文代真人。
WK喺覆信中話，覆得太遲唔好意思，仲話自己理論上係半退休人士，無諗過時間仲係咁珍貴喎。WK又強調，自己早前所講關於政改嘅言論，只係佢作為一個對公共行政具有經驗、對政局近距離觀察嘅個人意見，並不代表特區政府立場，亦不代表其他行會成員嘅意見。佢仲解釋，早前公開言論只係提醒大眾，政改唔單止係要討論特首提名程序，希望大家可以回到根本，睇吓有冇掛一漏萬，強調無意、亦無能力推廣佢對政改嘅個人意見。
唔想嘥時間重複觀點
其實婉拒出席咪算囉，但WK似乎好怕真普聯會掛一漏萬咁，提醒真普聯佢前幾個星期喺一份報章寫咗篇文章，與其要真普聯成員浪費時間去聽佢重複嘅論點，倒不如去睇吓佢篇文，睇完就會明白喎。