政情：民記傳爆倒葛潮
擴建堆填區建議喺兩個月前仲好哋哋，政府當時形勢大好，諗住三個堆填區綑綁投票，暑假前可以成功通過。點知堆填區目前已變成政府最大管治危機，就算由「好打得」嘅政務司司長林鄭月娥親自出手，都未必搞得掂。聽聞今次搞出個大頭佛，無論係政府內部或民建聯（民記）都覺得，經常高舉環保旗幟嘅民記新界東議員葛珮帆（EQ）係搞喎擴建堆填區嘅罪魁禍首。
葛珮帆頻游說黨友抗策
有唔少政界中人分析，睇番今次擴建堆填區風波，轉捩點一定係政府主動撤回擴建將軍澳堆填區。因為喺撤回前，雖然民記嘅元朗同屯門支部有不滿，但黨中央仍然有力壓住大局，唯獨EQ堅決反對，就算當時佢離港，都越洋喺背後發功，不停叫黨友唔好支持擴建將軍澳堆填區，又率先表明一定投反對票，搞到民記焗住喺六月尾宣布不支持擴建將軍澳堆填區。
事後有民記中人評估，覺得唔值得為一棵樹而放棄整個森林，因為將軍澳本身都唔係該黨票倉，就算EQ支持擴建，選舉上都唔會失好多票，最多只係一、二千票，再加上佢去年選舉係新界東票后，總共有四萬六千幾票，已經夠贏有凸，但偏偏佢為保自己「環保鬥士」形象，亦唔理民記生死，不斷游說其他黨友反對。
當時第一個叫政府撤回擴建將軍澳堆填區嘅人亦係EQ，點知政府又驚唔夠票，所以就喺工務小組投票日前夕主動撤回將軍澳申請，只申請擴建屯門同打鼓嶺兩個堆填區嘅撥款。點知咁做仲大鑊，兩區居民發現原來聲大夾惡就可以逼政府讓步，於是加入抗爭行列，就連鄉議局主席劉皇發也率領一眾鄉紳反對，令政府形勢急轉直下。
社交網貼黨聲明想補鑊？
所以民記同政府都覺得，如果當初EQ肯蝕底啲硬啃支持將軍澳堆填區當然最好，就算唔支持都唔好叫政府撤回，寧願三個堆填區齊齊闖關，咁將軍澳堆填區即使被否決，屯門同打鼓嶺居民都無咁大怨氣，兩個堆填區自然順利通過。事到如今，擴建堆填區一役搞到民記兩面不是人，據聞該黨內部仲湧現一股倒「葛」聲音，今次EQ真係唔知點收科喇。不過，EQ尋晚就喺社交網站貼出該黨支持擴建屯門同打鼓嶺堆填區嘅聲明，唔知係咪想補鑊呢？