中環出更：董吳玲玲愛駒勝出 帶挈老友
前晚快活谷馬場上演今季煞科賽，咁啱福建社團聯會副主席兼帝皇翡翠行政總裁董吳玲玲有兩匹馬出賽，贏馬信心倍增，董太於是特登請埋一班老友入場玩。結果往績唔錯嘅「翡翠明星」不負眾望，以熱門姿態勝出，董太近四十萬元頭馬獎金袋袋平安，亦帶挈眾老友贏得唔少彩金，為今個馬季畫上完美句號。
當晚座上有位稀客，佢就係前全國政協常委楊孫西囝囝楊華勇嘅外父莊哲猛。董太話，佢哋都係福建人，相識多年好投契。莊哲猛態度好和善，佢笑稱自己移居香港廿幾年，廣東話仍然識聽唔識講。自從五個幾月前，華勇及太太莊菲娜成功誕下囡囡後，莊哲猛同太太就好恨湊孫，經常三、兩日就要去探吓外孫女，佢笑稱，依家享受弄孫之樂，地產及珠寶生意已漸交畀拍檔同細女幫手打理。
暑假擬與老公帶孫女出埠
董太丈夫董中浩、大仔董必成及細仔董必政亦齊現身，仲有練馬師姚本輝、經營陀飛輪鐘錶生意嘅沈墨寧夫婦等人。董太話，放暑假期間係佢間印刷廠趕貨嘅旺季，但幾忙都要抖吓，正計劃同老公帶三歲孫女Molly出埠，過個開心暑假。