中環出更：莊家彬鄧鳳賢重遇嘆辣招
中環ifc向來多名人出沒，甚至有緣相遇。卓妮前日下晝見到莊士集團太子爺莊家彬（Albert）一支公現身ifc，佢行行吓就巧遇到恒基地產營業部副總經理鄧鳳賢（Anita），二人即熱情握手打招呼，好似久別重逢嘅好朋友。Albert問對方攞電話號碼，講講吓仲熱論政府推出嘅樓市辣招添！
前日下午三點鐘，戴住粗框眼鏡，身穿黑色恤衫、西褲加波鞋嘅Albert喺ifc出現，突然見Anita迎面而來，即趨前打招呼，Anita狀甚驚喜。佢哋企喺度傾咗陣，臨走前Albert問對方留低聯絡電話，最後二人握手道別。之後Anita再行到一間化妝品店極速購物，佢揀咗支潤唇膏後，試都唔使試就畀錢，仲即買即用，邊行邊搽。
指政府地產商需時磨合
卓妮後來致電Albert，佢話同Anita相識，不過一段時間冇見，所以問對方有冇改電話。問佢哋傾啲乜？Albert就話係互相問吓近況，以及交換吓工作上嘅意見。佢話，自從政府新修訂《一手住宅物業銷售條例》後，佢公司印製嘅售樓書，幾次都被政府打回頭，要延遲一個月先可以推出，佢話同Anita傾開，都覺得有關條例好棘手。
不過，Albert補充話，條例對消費者來講係好事，可以提升樓宇銷售透明度，況且每條新法例實施之時，一定會遇到難題，現時政府同地產商需要時間磨合，相信情況遲啲會好轉。
卓妮