負責捉賊嘅警察如果打家劫舍，甚至姦淫擄掠殺人放火，一般嘅講法係知法犯法，後果當然係罪加一等。至於負責反貪嘅廉政專員如果貪婪成性，知法犯法嘅情節梗係更加嚴重啦，否則湯顯明事件都唔會引起咁大關注，人人都覺得呢一個廉政敗家仔有辱門楣，前人積落嘅陰德幾乎由於一個人嘅缺德而前功盡廢。
香港五大紀律部隊之中，有冇其他知法犯法嘅敗類呢？答案係肯定嘅，主人翁係負責消災防火嘅消防處，處方員工嘅消防意識原來薄弱過販夫走卒，講起大概都冇人信呀，衰鬼！
有正常智商嘅普通市民應該都知道，走火通道唔可以放置雜物，以免火警嘅時候走投無路，防煙門必須長期關閉，防止濃煙四散令人窒息吖嘛。原來喎，消防處員工宿舍幾乎違反所有消防條例，知法犯法嘅程度比起廉政敗家仔有過之而無不及，可以稱之為消防忤逆仔。
消防忤逆仔嘅重災區係馬頭涌道救護站裏面嘅消防宿舍，幾乎每家每戶都將各式各樣嘅雜物放置門外，通道變得狹窄都唔在講嘞，最得人驚嘅係住戶出入必須好似參加障礙賽一樣，跨過紙箱，跨過掃把，跨過單車，跨唔過就會一仆一碌。
喂，消防員平時嘅例行工作之一就係巡視走火通道，一見雜物阻頭阻勢必然依法辦事，因乜事幹消防宿舍反而亂七八糟呢？其身不正，何以正人？漠視法紀嘅執法人員走去以法治人好大鑊o架，情況就好比一個自己有僭建嘅特首候選人，指摘另一個特首候選人有僭建，結果咪引火自焚囉，就算做得成特首都民望低落，出席學生畢業典禮都要受到奚落。
除咗馬頭涌道救護站之外，其他消防宿舍不遑多讓，普遍存在嘅弊病係九個字：亂亂亂，亂亂亂，亂亂亂！
功夫茶難免杞人憂天，萬一消防宿舍發生火警，消防員變成災民嘅時候，佢哋會唔會悔不當初呢？若然有消防員因為走火通道堵塞而燒死，或者由於防煙門冇關閉而吸入過量濃煙致命，負責審問死鬼嘅閻羅王大概會話，身為消防員竟然違反消防條例而火燒後欄，抵死啊抵死，即刻打落十八層地獄！
咦咦咦，消防忤逆仔原來唔止違反消防條例o架，消防宿舍明明禁止養狗，居然有人公然漠視禁令，帶狗自出自入當鄰居冇到。換言之，消防處好可能係一個視法紀如無物嘅紀律部隊。
所以話啫，自作孽，不可活，消防宿舍求神拜佛唔好火燭，否則人狗一窩燒到熟就該煨啦！