政情：今日你上鏡：愁容見光

發展局前局長麥齊光被控串謀詐騙租津，日前被裁定罪名成立，但獲准保釋，案件押後至下月八日聽取求情及判刑。前日下午約四點半鐘，我哋就見到麥齊光一支公現身中環環球大廈外嘅電車站等搭「叮叮」，當時佢身穿白色恤衫加深色西褲，孭住個深灰色背囊，車上似乎冇人認得佢。不過，麥齊光等車時一直眉頭深鎖，雙目無神，而且嘴角向下，一臉愁容，莫非佢內心感到徬徨無助？冇幾耐電車到站，麥齊光上車後走到上層搵咗個位坐低，之後往港島東方向離去。