每次政改展開談判時，各民間機構同專業團體都會發表意見，希望藉此搶佔輿論陣地，以捍衞自己利益。今次政改焦點，雖然集中喺特首選舉身上，但立法會功能界別存廢都係另一主戰場。有功能界別議員都知道今次政改有機會殺到埋身，所以最近已經開始搭定輿論平台，到政改開戰時順勢幫業界發聲，以免讓泛民主派一面倒控制輿論。
建築、測量及都市規劃界議員謝偉銓（Tony），雖然只係做咗一年議員，但唔代表佢咩都唔敢做。近月佢已經悄悄地成立咗個新平台，廣納界別內嘅建築師、規劃師、測量師等專業人士加入，討論嘅並非業界議題，反而會主打政治議題，希望會員喺唔同政治議題上表態，例如普選形式、功能界別存廢，甚至對佔領中環行動嘅睇法。
Tony話，政改問題冇得唔理，如果去到投票前一刻先諮詢業界就太遲，所以依家早啲搭定個平台，順便做吓民調研究都係好事。Tony呢一招都算有策略，因為政府諮詢政改期間，經常話收集民意，但呢啲民意喺邊度嚟呢？好多時就係靠呢啲平台畀意見，而Tony一早搭定平台幫班專業人士發聲，只要人數夠多，就可製造保留功能界別嘅聲音。