前商務及經濟發展局局長馬時亨（肥亨）離開政府已經五年，而新一屆政府上任都一年啦，但有報道翻炒政府高官過去六年嘅收禮紀錄，指佢任內收受兩條珍珠頸鏈，但就冇交代頸鏈嘅價值同去向，有「落格」之嫌，激到肥亨生蝦咁跳，大叫冤枉喎。
肥亨尋日出席活動，撞啱立法會議員劉慧卿同行政會議成員羅范椒芬，三人即刻肉緊合照，劉慧卿仲打趣話今次行政、立法機關罕有合照，再加埋「疑似港鐵主席」就最好喇！
肥亨日前獲港鐵委任為非執董，本身已經係好多間上市公司非執董嘅佢，仲盛傳有機會接替錢果豐做港鐵主席，更上一層樓。
但聲譽對肥亨嚟講先係最重要，佢喺活動上主動向我哋呻，指○八年的確獲江西省同湖南省政府送禮，分別係一條淡水珍珠頸鏈連胸針同洞庭珍珠頸鏈，但兩條頸鏈都只係值四百元，啱啱好符合守則，冇超出准許上限可以作個人保留。
不過，肥亨為怕麻煩，最後都將佢哋捐出嚟畀同事作抽獎用。總之兩條頸鏈都係意思意思，唔係乜嘢名貴首飾，況且佢都無據為己有，所以大呼冤枉。