政情：終極一「發」搏到盡
今屆鄉議局任期將會喺二○一五年初結束，雖然仲有兩年時間，但對於領導層執位傳聞已經滿天飛。主席劉皇發（發叔）已年近七十七歲，又多次喺公開場合表示想退休，所以班鄉紳相信發叔做完今屆主席後，好大機會卸任。原本等退休好正常，但向來同港府合拍嘅發叔近日一反常態，就擴建屯門堆填區事件同港府撐到行，有鄉紳透露，發叔想喺餘下兩年任期搏到盡，爭取最大利益。
領導層勢爆爭位戰
鄉事圈內一直有個講法，就係發叔卸任前，該局一定會立立亂。有傳屬於大埔約並擔任鄉議局副主席多年嘅行政會議成員張學明，好大機會問鼎下屆主席寶座。至於另一副主席林偉強亦好大機會跟隨發叔一齊退落嚟，加上張學明「升呢」後嘅副主席空缺，兩個位將會成為元朗約及南約之爭。
元朗約方面，邊個最想爭做副主席就未知，但未爭位前就先要順利連任本身嘅鄉事委員會主席個位，聽聞暫時只有廈村鄉委會主席鄧勵東及錦田鄉委會主席鄧賀年較易順利連任外，有消息話屯門鄉委會主席何君堯及屏山鄉鄉委會主席曾樹和嘅議席可能會受到挑戰。至於南約方面，副主席大熱就係荃灣鄉委會主席鍾偉平。
企硬反擴建堆填區
正因為鄉委會主席要爭取連任，據聞連任與否，好多人都深信仍有賴發叔支持，由此引證點解發叔表明反對擴建屯門堆填區後，各村各鄉就一呼百應咁表示反對喇。不過，聽聞發叔始終喺呢件事嘅立場企得好硬，皆因佢要喺卸任前爭取最大利益，但唔知係咪為咗原居民嘅利益呢？
不過無論如何，總之發叔一卸任，鄉議局領導層爭位戰在所難免，未來兩年內乜嘢都有可能發生，除咗發叔本身之外，鄉事嘅問題亦會陸續浮現，相信到稍後時間，執位形勢才會明朗化。