中環出更：唐太巡大宅 走後門閃人？
位於九龍塘約道嘅前政務司司長唐英年大宅僭建二千呎地庫，屋宇署飭令要做回填工程，但到尋日都仲未灌石屎，工人仍然忙於搬搬抬抬，似乎個地庫大到啲傢俬搬幾日都搬唔完。大宅女主人唐太郭妤淺下晝就再次現身巡視進度，不過就見佢入唔見佢出，懷疑走後門離開。
地庫仍未灌漿 拒答提問
原本有傳最快尋日會做灌「輕石屎」嘅工程，但尋日工人只係繼續將大宅嘅傢俬搬走，包括疑似酒吧櫃、梳化、長椅同冷氣機等，足足車咗五、六轉咁多，不過就唔見讀者提供畀我哋嘅圖片裏面嗰張洗頭椅。而前日已抽乾水嘅水池，工人就喺旁邊加建咗鐵枝同鐵鏈做圍欄，大宅入面不時傳出鑽牆嘅聲音。
唐太喺下晝三點幾再返到唐宮巡視進度，不過今次佢就唔肯回答問題，記者問佢係咪灌漿，佢只係揮揮手冇回應。之後仲有入冇出，只係見一架疑似載佢嚟嘅私家車喺傍晚五點幾離開，工人之後就話佢已經走咗。相信佢係用番選舉時避記者嗰招，座駕由正門離開，再由後門接走佢。
卓妮