中環出更：親自買酒宴客更「加」抵「讚」
喜運佳鐘錶主席蔡加讚（Karson）仲有幾個月就做「老襯」，於年尾迎娶未婚妻汪圓圓。隨住婚期愈來愈近，相信Karson喺籌備婚禮同公司生意兩邊忙。卓妮日前下午途經中環歷山大廈時，就見到Karson獨自走入一間酒舖選購靚酒，莫非想揀定一批佳釀，準備喺婚宴上大宴親朋？
當日Karson西裝骨骨，剪咗一頭清爽短髮現身，亦未見有保鏢尾隨。Karson入到酒舖，店主隨即熱情上前招待，佢向店員講出想買嘅酒類之後，店員挑選咗一陣，就向佢介紹咗幾支白酒。Karson拎起研究一會，似乎對支酒好滿意，爽快買咗三支就離開。
忙辦婚事 仍不忘工作
卓妮上前同Karson打招呼，問佢買嘅係咩酒？佢就話係餐前酒，諗住見客傾生意時用喎。佢話，知道對方有飲用餐前酒嘅習慣，但佢屋企就冇存放餐前酒，所以特別過來買幾支酒，諗住投其所好，傾得成生意嘅機會都高啲。佢笑言，自己對餐前酒冇乜研究，所以都係聽店主介紹咋，三支酒買咗二千元，都算超值。
講起頭婚事，Karson不期然甜笑，佢話依家仲籌備緊，場地已定咗喺會展，至於擺幾多圍，佢就賣個關子喇。Karson喺愛情與事業之間兩頭忙，竟連餐前酒都親力親為去挑選，睇嚟唔止抵讚，應該「加讚」至啱。
卓妮