孔子名丘字仲尼，孔老夫子嘅真正身份係乜呢？有人話佢係萬世師表，有人話佢係失意政客，計功夫茶話齋，孔子嘅真正身份其實係貴族，否則當初佢根本冇辦法讀書識字，長大成人之後更加冇可能學而優則仕，周遊列國做官唔成走去教書係後話。
古時候讀書係一件十分奢侈嘅事，因為課本所用嘅竹簡太貴，普通人家負擔唔起，惟有做一個雞乸咁大隻字都唔識嘅文盲。正正由於飽讀聖賢書唔容易，難過家陣窮鄉僻壤嘅希望工程，所以貴族出身嘅孔子提倡「有教無類」，更加凸顯佢嘅高尚情操。亦即係話，孔子好贊成窮人接受教育，老早就明白知識改變命運嘅大道理，求學係脫貧嘅不二法門。
既然係咁，教育工作者走回頭路，本地學校大搞貴族化，變相將窮等人家拒諸門外，啱數唔啱數呢？萬世師表若然翻生睇到咁嘅情況，大概會搖頭晃腦嘆一句，吾不欲觀之矣！
即係咁，聖士提反女子中學打算轉為直資，等於將學校貴族化，畀唔起高昂學費就唔使旨意入讀。呢一件事激嬲唔少人，有人成立「聖士提反女子中學舊生直資關注組」，發起「守護聖士提反，向轉直資說不」嘅遊行。狂風暴雨之下，百幾個學生、家長同校友手牽手抗議轉直資，小妹妹梨花帶雨淚灑當場哭護母校。甚至乎，學校創辦人之一曹善允嘅孫曹禮都現身遊行隊伍之列，要求校董會懸崖勒馬，否則就係違反聖士提反嘅核心價值。
至於另一間學校聖保祿中學，同樣係計劃轉為直資，同樣係受到群起反對。「反對聖保祿中學轉直資關注組」列出反對嘅十大原因，主要就係唔贊成將教育傾側於富裕學生，剝奪弱勢階層求學上進嘅機會，直資嘅計劃違背教學理念以及辦學精神。聖保祿嘅校訓係「為一切人成為一切」，意思差不多就係孔子嘅有教無類，一旦轉為直資咯喎，實際情況可能係「為有錢人成為一切」。
中國嘅科舉曾經係全世界最先進嘅制度，任何人不問出身都可以透過科舉考取功名獲得利祿，窮書生都有潛質金榜題名，只不過後來變質為八股僵化咁解。因乜事幹香港嘅教育制度反而只問出身趕絕窮人呢？喂，入學講究世襲關係已經備受批評啦，家陣再有學校醞釀貴族化，即係出身寒微免問啫，反對聲音絕對唔係無的放矢喎。
反對者其中一個訴求係希望教育局出手，否決學校轉直資嘅申請。好心教育局局長吳克儉唔好餐餐「唔得掂」，諗諗辦法防止學校貴族化嘅趨勢，扼殺窮書生有違教育道德ｏ架！