港府日前公布「加強版」新界東北發展方案，基本回應咗有關官商勾結、「深圳後花園」同復耕安排等問題，但就畀反對人士搵到粉嶺高球會呢個新攻擊點。據聞發展局亦估唔到呢個歷史問題，咁快畀人炒起，依家都幾頭痕，要諗計拆彈。
其實發展局局長陳茂波亦公開講過，負責私人遊樂場地政策嘅民政事務局，現正檢討緊包括粉嶺高球會在內嘅多幅體育會及會所地皮續租，發展局亦已將高球會地皮，納入下一階段嘅新界北發展規劃檢討，但始終冇乜人相信政府真係夠膽郁動呢片富豪樂園。
有熟悉整個新界東北發展歷史嘅人就話，新界東北嘅基本發展藍圖，早喺一九九八年制訂，當年亞洲金融風暴啱啱先結束，香港負資產遍地，同依家全港鬧地荒嘅情況啱啱相反，大家諗下一步發展時，只會向未有正式規劃用途嘅農地同鄉郊地埋手，冇人會諗到要郁高球會。至於檢討體育會用地問題一拖再拖，亦係上屆貪曾政府同民政局局長曾德成嘅問題，並非陳茂波所能控制。
為咗顯示政府真係有心檢討粉嶺高球會地用途，據聞發展局會考慮去信高球會，表明有關用地已被納入新界北發展檢討範圍，政府有權根據地契給予合理通知後收回地皮云云。唔知高球會嘅負責人同富豪會員會唔會請願，爭取粉嶺高球會「不遷不拆」呢？