政情2.0：有相為證︰港鐵「代言人」
前高官馬時亨（肥亨）多年前因病退出官場後，一直過着退而不休嘅生活，前後做過好多間上市公司嘅非執董職位，上星期四仲公布咗佢獲委為港鐵董事局非執行董事。咁啱早前下午約兩點鐘，我哋撞見肥亨與朋友現身尖沙咀半島酒店，佢哋行到尖沙咀港鐵站後，肥亨就同朋友道別，然後一支公搭港鐵過海。
肥亨喺擠迫嘅車廂內，同大多數乘客一樣全程係咁篤佢手上嘅平板電腦，話咁快到咗金鐘，肥亨施施然出閘。咁啱得咁蹺，佢喺扶手電梯口撞見立法會議員梁君彥，兩人仲寒暄一番。我哋上前同肥亨打招呼，佢笑笑口話，有時喺九龍出席完活動，為咗避免塞車，多數會搭港鐵過海。好似今次都只係用咗十分鐘，唔使十蚊就輕鬆過海，真係經濟又環保。
肥亨做官時，係地鐵同九鐵合併嘅主將之一，怪不得佢話同港鐵好有感情，今次仲做埋非執董又搭港鐵，直情係代言人添啦。