政情2.0：八網難逃︰「男人愛高達」遭政治炒作？

有人話香港唔少議題都變得政治化，呢句說話都冇錯，皆因原本應該充滿童真同埋歡樂嘅玩具舖竟然都畀人將佢同政治扯上關係。社交網站流傳咗張售賣日本進口玩具嘅玩具舖貼圖。話說呢間玩具舖就喺門口招牌位置貼咗兩句好搶眼嘅標語，話︰「女人愛手（首）飾，我真係唔識。男人愛高達，女人唔明白」。唔少網民就透露呢間店舖專出金句，亦有網民話對呢兩句說話好有同感，仲好想知間舖頭喺邊添。不過都絕唔過有人將句說話用作政治炒作，話標語中嘅「高達」，絕對唔係指有「高達」之稱嘅白鴿黨李永達同愛港之聲嘅高達斌喎。