經營股票行嘅金融服務界議員張華峰（肥峰）過去四十年全靠喺金魚缸致富，見盡大小金融風暴海嘯，不過佢話自從當選議員後，都無再買賣手上股票，所以錯過今年年頭持續兩個月嘅大牛市，夾夾埋埋都少咗差唔多搵少七位數字。
肥峰話做議員後唔沾手股票，唔係擔心有利益衝突，而係因為太忙而無時間再睇實個市，畢竟佢係第一年做議員，都係要了解清楚議會環境，明白所有會議係搞乜東東，有乜嘢會議要特別多加留意，所以自然就無時間看住個市。
佢舉個例，自己手上有一堆港交所（00388），偏偏今年年初升成一成以上，最高位去到一百四十九蚊，如果淨賺呢一筆都夠晒和味啦。
講起股市，張華峰仲大派貼士，佢話美國退市都唔使驚，因為聯儲局退市正正係散戶入市訊號。
原來肥峰係玩捉心理，佢解釋指聯儲局唔係傻嘅，當然認為個市有上升趨勢先肯「收水」，所以退市後或一定有少少陣痛，但美國所有消費、出口數據都唔差，個市自然從低位慢慢反彈，所以肥峰先叫大家儲定子彈，一退市即刻撈平貨。言下之意，出口股將大有所為。