政情：傳媒難播「精警發言」 葉劉嘆立會埋沒英文
行政會議成員兼立法會議員葉劉淑儀尋日出席青協活動，同一班中學生分享英語學習之道。葉太慨嘆依家愈來愈少機會講英文，就算連立法會開會都係以中文為主，原因並唔係啲議員唔識講或者唔鍾意講英文，而係因為用英文講嘢，傳媒要播出sound bite（精警發言）較困難。
有時「度」定一兩個備用
葉太話，從政人士發表偉論時通常都會整番一至兩個sound bite，例如英國前首相邱吉爾發表演說時經常夾雜大量sound bite，葉太有時都會「度」定啲sound bite以備不時之需。
不過佢話市民通常對英文sound bite無乜特別感覺，所以佢啲sound bite都係以中文為主。
不過葉太話，精警發言唔一定係好事，相信佢講緊嘅一定就係自己十年前出任保安局局長，向市民推銷《基本法》廿三條時講過「葉局長無呃你，放長雙眼睇啦」嘅一句經典sound bite。
葉太又話，立法會來來去都只得幾個議員用英文發言。其實用中文發言，一般市民容易入耳，但都要言之有物至得。