政情:為轉戰新東直選發功?大輝「過界」撐辣招苦主

抗議政府推出連串壓抑樓市辣招嘅「辣招苦主大聯盟」前日舉行遊行,大會話有成二萬三千人參加。參加呢個遊行嘅除咗一眾地產代理,仲有立法會議員林大輝。不過大輝係工業界議員,照道理就大纜都扯唔埋。之但係大聯盟嘅發言人何民傑係西貢區議員,莫非有意喺新界東直選嘅大輝已開始發功﹖

自稱受邀參加遊行

「辣招苦主大聯盟」前日舉行遊行,大輝當日認真積極,唔止手持橫額行喺隊頭,仲行足成個遊行,唔知仲以為佢係地產界議員添。大輝之前都有提過想喺下屆立法會選舉轉直選,仲有機會出戰新界東。咁啱何民傑喺新界東又咁活躍,大輝咁落力難免會令人引起大輝想投桃報李嘅遐想。

我哋就問過何民傑,佢話佢向七十位立法會議員發出邀請信,邀請佢哋參加遊行聲援業界,點知得大輝一個回覆話會出席。佢同大輝只係喺立法會嘅公聽會碰過面,過往完全冇合作過,今次大輝竟然咁畀面行足全程,所以好多謝大輝。

大輝就話,自己係因為受到地產代理嘅邀請先參加遊行,仲話本港一向崇尚自由經濟,政府辣招帶嚟唔少副作用同後遺症,盞打爛香港金漆招牌喎。

第一手消息請下載on.cc東方互動iPhone/iPad/Android/Windows Phone Apps