政情：教協打吳克儉主意

葉建源舊年接替因病退選嘅馮偉華參加立法會選舉，之後葉建源向教協提出希望可以做少啲會務，以便放多啲時間喺立法會工作上。教協雖然試過登廣告公開招聘城中有能之士，但最後只係搵咗個有豐富行政經驗嘅應徵者出任副總幹事。

教協搵咁耐都搵唔到人，歸根究柢係因為佢哋要求太高，但又出唔起高人工。事關教協總幹事嘅人工只係同一個中學校長差唔多，加上教協每兩年就要經歷一次選舉，所以唔少教育中人都寧願安安穩穩咁留喺學校教書，都唔想去教協做一個全職總幹事。

公開招聘搵唔到合適人選，教協內部主要理事又唔想接手呢個燙手山芋，加上理事陳洪表明最多只會幫手頂住兩年，之後就會盡情享受退休生活，面對日子一日一日咁過，但仲係搵唔到心儀候選人，教協內部真係諗到頭都大埋。

請老師或校長停薪留職試做

不過，現任教協會長馮偉華尋日話教協終於諗到點樣吸引人做總幹事，就係問教育局借人。佢話教育局之前搵現職老師設計通識科教材時，試過用「停薪留職」呢招，直接畀錢學校請代課老師，等現職老師可以幫教育局設計課程嘅同時，又可以唔使驚無咗個教席。佢話教協可以照辦煮碗跟住嚟做，請個老師或校長停薪留職去做總幹事，如果當事人做咗一陣覺得唔啱，都可以返番去教書，但前提要得到教育局同學校同意。

教協撐泛民 當局點會應承

之但係如果教協開到聲問教育局局長吳克儉要人，相信吳克儉一定會耍手擰頭，事關教協一向企喺泛民嗰邊，喺唔少教育議題上都同政府對着幹，試問吳克儉又點會容許自己嘅教師掉轉槍頭攻擊自己呢？

根據教協網頁，教協有會員八萬人，全港有多個辦事處，乜都有得賣，難怪要物色一個大內總管，比搵人去選立法會仲難。