中環出更：心繫母校 胡應湘飲水思源
合和實業主席胡應湘（哥頓）年輕時曾經赴美國普林斯頓大學，修讀土木工程學士畢業，佢公子胡文新亦喺該校肄業。十多年前佢捐過一億美金畀母校，成為一時佳話。卓妮日前喺一個活動上遇到哥頓同太太郭秀萍，胡太話上月佢哋兩公婆去美國度假，但主要目的係陪老公出席校友會聚會。哥頓已經畢咗業五十五年，依然心繫母校，認真長情。
每五年出席校友會活動
哥頓年近八十歲，但從未言退，佢話自己每隔五年就會返母校出席校友會活動。哥頓話，四年校園生活留畀佢唔少美好回憶，但最重要嘅係佢好欣賞校方嘅宗旨。佢話，當年唔係個個留學生都生活富裕，但只要係收咗嘅學生，生活點艱難都好，校方千方百計都會供學生讀書。
哥頓笑言，雖然當年有爸爸做佢支大水喉，唔需要校方資助，但佢好欣賞該校有教無類嘅精神，仲話該校畢業嘅學生，超過七成都會自動自覺回饋母校。哥頓鼓勵時下年輕人多啲飲水思源，關心吓母校發展。
卓妮