中環出更:自爆去年通波仔「肥龍」瘦晒

前政務司司長許仕仁捲入官司,佢兩公婆喺社交圈子絕迹,卓妮亦未試過喺街上撞到佢哋。上周六,許仕仁同太太現身金鐘廊,面容好輕鬆,不時有笑容,睇嚟佢哋已將官司嘅煩惱暫且擺埋一邊。瘦版「肥龍」許仕仁自爆話去年做過通波仔手術,依家應該康復得唔錯。

當日氣溫高達卅幾度,許仕仁不但着住成套西裝,仲拎住件厚身外套,真係睇見都覺得熱。佢同太太喺金鐘廊行過一間餅店,許太佇足餅櫃前,對住啲西餅指手畫腳,期間許仕仁笑得好開心,跟住爽快買咗盒西餅。之後兩公婆施施然行去附近嘅力寶中心一間咖啡店。

美食當前 為西餅破戒

當許仕仁入去買咖啡時,卓妮趁機上前同許太傾偈,許太大呻話,佢屋企樓下經常有傳媒留守,兩公婆出街食飯都被人跟住,冇晒自由。講講吓,許仕仁買完咖啡出來,近距離見到佢更顯消瘦。佢自爆話,去年做咗通波仔手術,身體唔係咁好。心臟唔好仲食甜品?一向都愛美食嘅許仕仁就笑笑口話,見到啲西餅咁靚,忍唔住口,所以破戒買兩件返去慢慢歎囉。跟住兩公婆就講再見,落地下乘座駕離開。

許仕仁單官司,明年五月開審。

卓妮

第一手消息請下載on.cc東方互動iPhone/iPad/Android/Windows Phone Apps