港產官僚冇嘢叻，最叻就係吹水，一時話房屋問題係施政重中之重，一時話寸土必爭見縫插針，可惜吹嚟吹去都係得個吉，所謂重中之重、寸土必爭，純粹係大隻講。
話說當局日前拋出發展新界東北嘅所謂終極方案，唔少團體一直爭取納入規劃嘅粉嶺高爾夫球場居然隻字不提，令人質疑當局係咪真心解決房屋問題。港產官僚又點解釋呢？發展局局長陳茂波話喎，粉嶺高球場租約至二○二○年至屆滿，無法趕及成為新界東北新發展區替代方案。點知本報記者翻查粉嶺高球場地契發現，當中列明政府有權按公眾需要收回全部或部分土地，只需十二個月前通知，仲毋須作出任何補償添。陳茂波謊言被踢爆之後，又改口話就算收回粉嶺高球場地皮發展房屋，亦唔係幾年間可以做到，因為該地面積大，要做多方面嘅技術評估，包括環境影響、基建設施、交通及排污喎。
嗱，呢啲咪就係狡辯囉。所謂租約未到期、要做技術評估等等，根本搵嚟講，如果當局真係有心收回地皮，一年就得嘞，使唔使講咁多耶穌吖？又使唔使評估咁耐吖？研究幾年喎，中國人都上到月球喇。其實，港產官僚諸多狡辯及推搪，講嚟講去只有一個原因：嫌貧愛富。粉嶺高球場佔地一百七十公頃，會員只有二千人，可謂非富則貴，港產官僚巴結都嚟唔切喇，又點敢得罪佢哋吖，所謂研究收回地皮，只不過係敷衍市民嘅咋，信佢一成，雙目失明吖！
所以話，官僚靠得住，豬乸會上樹。港府口口聲聲發展新界東北，最後唔知要徵收幾多農地，趕絕幾多鄉村，迫遷幾多居民，但就放過僅供少數富豪權貴享樂嘅粉嶺高球場，你話係咪本末倒置，捨近求遠吖？有人計過數，淨係粉嶺高球場嘅一百七十公頃，就接近十六個彩虹邨咁大；而全港私人高球場佔地總共達到三百八十公頃，足足可以興建一百三十五個牛頭角下邨，提供大約五十五萬個單位，令一百三十五萬名市民安居。事實證明，香港唔係冇地起樓，而係港府嫌貧愛富，一方面賤價批地畀少數富豪權貴享樂，另一方面漠視無殼蝸牛苦況，咁嘅政府根本就係以富為本，以民為笨。
咪話功夫茶唔提醒，不患寡而患不均，不患貧而患不安。香港貧富懸殊已經夠嚴重，深層矛盾已經夠尖銳ｏ架喇，如果港府繼續官商勾結，一味偏幫富豪權貴，盞進一步激化仇富情緒，大家都冇運行嘅咋。嗱，七一有四十三萬市民冒雨上街，證明香港人已忍無可忍，唔通港產官僚仲未知驚！