政情：何君堯搞大聯盟 搶鄉局客？
早前疑就新界村屋僭建問題同鄉議局打對台，繼而發起「小雨點行動」嘅一班村民及村代表，尋日正式宣布成立新界關注大聯盟，而大聯盟嘅靈魂人物就係之前發起行動嘅屯門鄉事委員會主席何君堯，以及聯盟主席鄧鎔耀。話明新界關注大聯盟，梗係主要關注新界事務，但佢哋嘅立場似乎同鄉議局有啲分別，莫非要同鄉議局搶客？
民間組織 關注新界
何君堯話，同鄉議局可算係合作關係，只係鄉議局係港府法定嘅諮詢組織，而佢哋就係民間組織，唔止關心原居民問題，遲啲或會有啲於新界屋苑嘅業主立案法團主席加入添。鄧鎔耀就話，鄉議局有掣肘，所以如果村民反對政府嘅政策，佢哋可代為發聲喎。咁大聯盟成立係咪為未來多場選舉做準備呢？何君堯話，暫時未有呢個打算。
大聯盟尋日仲詳列佢哋嘅立場，如反對新界村屋僭建物申報計劃、擴建堆填區及支持興建屯荃鐵路等。此外，機場擴建第三條跑道、新界東北發展及提升村代表津貼等，真係新界乜都關佢哋事。鄧鎔耀話，依家聯盟有五十名會員，逾千名支持者，唔使太多營運成本，資金來自大家內心喎。