政情：馬逢國橫額真攞「膽」
西九文化區嘅硬件開支屢傳超支，配合硬件嘅文化藝術軟件亦遲遲未見有大動作，立法會體育、演藝、文化及出版界議員馬逢國尋日就舉行藝術教育講座一齊「腦震盪」。不過，講台上嘅大型橫額就有甩漏，竟然將藝術教育前瞻誤寫為「前膽」，莫非馬逢國認為搞藝術教育最緊要有膽識？認真攞膽！
藝術講座現錯字
呢張「藝術教育前膽」橫額曝光，都係多得一位姓冼嘅參加者出席講座時，眼明手快發現並分享到社交網站，隨即惹來網民熱議。有網民笑言，可能真係要「有膽」先好搞藝術。另有網民則揶揄話，呢啲低級錯誤都可以出現，反映在位者、教育工作者都唔見得有幾好，所以唔好成日話香港年輕人語文水平每況愈下喎。
馬逢國接受查詢時形容，呢個並非手民之誤，其實係「腦」民之誤，因為係同事叫橫額公司製作，錯誤係源於電腦打錯字，佢本人都係去到現場先見到呢個問題。不過，當問及會否擔心被網民借題發揮時，馬逢國則大方話無所謂，究竟係佢本身為人阿Q，定係明知逃唔過網民監察所以寧願睇開啲呢？