政情：地產界大迷信「銓」聞
商人陳振聰利用風水師身份獲取已故華懋集團主席龔如心幾十億元，最後被判偽造遺囑及行使虛假文書罪名成立，判監十二年，案件已成為城中茶餘飯後嘅熱門話題。曾經喺多間大地產商任職過嘅立法會建築、測量及都市規劃界議員謝偉銓（Tony），大爆地產商篤信風水命理，唔單止起樓前要為地皮睇風水，每次動工同竣工賣樓前都要拜過神先至安樂。
Tony話，唔少地產界人士都信風水可以催吉避凶，地產商每逢起樓前，都會為地皮睇風水，之後佢哋就會參考風水布局作規劃，如果兩者出現衝突，就會向老闆請示點做。原來Tony本身唔信風水命理嘅，如果佢發現地盤建築同風水有衝突，好多時老闆都會尊重佢嘅意見，唔會為咗風水夾硬嚟起樓嘅。
唔信風水 拜神因想食燒豬
未起樓已經要睇風水，新盤開售前當然要拜神啦！Tony話，早年新盤交投非常淡靜，當時佢任職嘅地產商仍然準備推出新樓盤，雖然佢同其他同事一早已經打定輸數，但仍然堅持傳統習俗燒香拜神。世事就係咁奇怪，唔知點解拜神後，新盤開售竟然吸引唔少投資者買樓，令Tony喜出望外。
之後又有一次，Tony公司唔知因為咩原因而冇拜神，結果樓盤就賣得麻麻哋，搞到佢都覺得拜咗神會好啲咁。即使Tony後來跳槽去新公司，仍然每年會與同事去拜車公，保佑來年工作順利。Tony話，雖然自己唔信風水，但佢仍樂於參與大大小小嘅拜神儀式，事關拜神後一定有燒豬食喎。
家住東區嘅Tony又話，曾經有個對風水甚有研究嘅同事話佢屋企風水麻麻，又話佢南區舊屋啲風水好啲，但佢都係一笑置之，無特別理會同事講嘅嘢。佢仲特別提醒大家，凡事都唔好盡信風水命理，要對自己嘅決定有多啲信心，否則條命生得幾好都無用喎。咁又係，陳振聰精通風水又點呢，最後都係走歪路救唔到自己。