中環出更：婦協創會姊妹 不老的傳說
相信係女人都想青春常駐，年齡嘅秘密永遠都冇人知，香港各界婦女聯合協進會（婦協）主席林貝聿嘉就有一套獨特嘅養生秘訣，尋晚仲同大家分享一班創會姊妹嘅陳年舊照，由大家比對一吓廿年前後嘅不老容顏。冇錯，林貝聿嘉講緊嘅青春秘密就係加入婦協，效果顯唔顯著就靠大家自行判斷喇。
林貝聿嘉騷舊照作比對
婦協尋晚舉行晚宴慶祝成立二十周年，創會委員范徐麗泰同梁愛詩亦應邀出席，唔少會員仲以旗袍打扮現身，盡顯東方美。林太致辭時講到，婦協呢二十年發展不但快過中國嘅航天科技，連一班創會姊妹都冇咩點變，反而後生咗添！唔係嘛，返老還童咁弔詭？林太話，班好姊妹多年來一直喺精神、金錢同行動上支持婦協，心境開朗自然青春常駐，呼籲女士們加入婦協保容顏喎。
晚宴場刊仲特別刊載多位創會委員嘅陳年舊照，只見除咗梁愛詩多年來連髮型都冇變過外，其他委員無論髮型定形象都已經執晒位。搵來搵去，相信唯一個樣冇乜點變嘅就係林太，就連主席個位亦一坐就二十年，冇變過。
卓妮