中環出更：劉展灝接棒 受命勵精圖治
四大商會之一嘅工業總會日前舉行周年大會午宴，由副主席兼運年表業集團董事總經理劉展灝（Stanley）接棒做新一屆主席，卸任嘅前主席鍾志平（Roy）心情輕鬆，喺致詞時公開向Stanley「施壓」，要佢喺未來兩年任期內幫工總攞個「最佳管治獎」返嚟，台下賓客隨即拍掌呼應。不過，Stanley冇有怕，笑笑口話會同工總同事盡力完成呢個任務。
查實Stanley早年擔任香港表廠商會會長時，曾獲香港董事學會頒發非牟利機構最佳管治獎，成為第一間獲此殊榮嘅機構，難怪佢胸有成竹喇。
工總換班 政商畀面
當日到賀嘅政商名人數以百計，包括行政及立法雙料議員林健鋒（Jeffrey）、工總立法會代表梁君彥、「耳機大王」電子業商會會長楊志雄、「糖薑大王」余達之孫女余皓媛、德國寶老闆陳國民、提升快樂指數基金主席吳宏斌等。
其中Jeffrey三代同堂現身，佢爸爸林亮、囝囝林凱章及外甥兼工總青委副主席陳允誠都去捧場。早前Jeffrey喺中環設宴請客，傳聞話佢中咗六合彩頭獎，但佢就澄清從未買過六合彩，請客皆因早前以十元買馬中咗五萬多元彩金喎！
凝聚業界第二、三代嘅青委同時換屆，前主席孫榮聰「畢業」後躋身工總理事，由德國寶太子女陳嘉賢（Karen）接任。Karen話，如何傳承祖業又令公司更上一層樓，係多數成員面對嘅問題，所以佢哋會繼續邀請成功名人開講座分享，下一個嘉賓係「九巴金公主」伍穎梅。
卓妮