城巴車長昏厥 生死時速3分鐘
午夜城巴在西隧管道突變「無人駕駛」，兩名80後青年歷經三分鐘「生死時速」，勇救全車人！一輛從荃灣開出的過海城巴，昨日凌晨駛入單管雙程行車的西隧管道，中年車長突全身抽筋暈倒，差點要跌出駕駛位，巴士失控向左「片」及擦壆前行，隨時車毀人亡，千鈞一髮之際，下層兩青年奮身救車及救人，將車長抬到走廊後，又在滿布按鈕的錶板前尋找煞車掣，最終「篤正」死火掣將巴士煞停，結束驚心動魄的三分鐘，最終化險為夷，車長送院治療，意外中無人受傷，亦無殃及其他車輛。
兩名英勇乘客分別姓袁（卅一歲）及姓陳（廿六歲），袁每日送女友返葵涌邨寓所後，均會乘搭城巴930過海回家。陳事發時剛放工從沙咀道車站登車回家。而暈倒城巴車長姓岑（五十五歲），據知今年年初入職任車長，駕駛來往荃灣碼頭至金鐘的城巴930號線，上周一（本月一日）曾休假，有患病紀錄。
擦左壆奔馳 先抬出司機
昨日凌晨接近一時，岑駕駛尾班車從荃灣西站總站出發，駛入西區海底隧道時，全車共有七名男乘客，五人坐在上層，陳及袁則坐在下層座位，其中袁坐在車門後第二排座位。當城巴駛入西隧管道中段時突然收慢，繼而意想不到的事情發生了。
袁昨晨向本報記者憶述：「當時我坐喺落車門後排，見個司機突然向左擺，就嚟跌出嚟，成個人震晒，於是大叫司機暈咗，當時巴士車速大約每小時二十至三十公里，向左擦牆行咗六米，我自己頭三秒都幾驚，但都冇辦法，即刻衝出去錶板搵死火燈，但搵極都搵唔到。」下層的陳聞訊增援，兩人處變不驚，合力將司機抬出至走廊。
當時因單管雙程行車，而對面線亦有車輛駛至，過程險象環生，袁稱：「好彩司機已經鬆腳，又冇車經過，又好彩架巴士係向左擺，而唔係向右擺，如果唔係隨時有車撞埋嚟就死硬……」另一邊廂，陳捉緊軚盤，穩定行車方向，亦嘗試將車煞停。據陳稱：「聽到有人嗌司機暈咗，都冇得驚啦，我即刻衝出去捉住個軚盤，但因為太多掣，我又唔識操作，又搵唔到死火燈，當時最希望個司機冇事，佢當時仲有呼吸，其他人都叫佢鎮定啲，好彩最後喺軚盤旁邊見到有個Label寫住係死火掣，即刻撳停部車。」
「大家都唔識 出奇合拍」
當袁、陳二人忙於救車時，上層的五個大男人亦衝落下層了解，由車長暈倒及煞停車，全程約三分鐘，其後有其他乘客致電報警；有人試圖喚醒昏迷車長；也有人在停車後跳車先離去。袁事後稱：「雖然大家都唔識，但出奇合拍，好鎮定，有人試吓嗌醒司機，後面又有人報警，好彩最後都冇事，我今朝起身都覺得執番身彩。」其後，警方及救護車接報趕至，將車長送院救治，幸抵院時已復甦。昨日兩人對出手救人救車表現謙虛，婉拒「英雄照」見報，又表示「只是本能反應，係人都會咁做，攞唔攞表揚無所謂」。
城巴發言人表示，在昨凌晨一時許已收到通知，指有車長在行駛期間突然不適，目前他仍留醫觀察，正了解事發原因。發言人指，目前新入職車長必須要通過身體檢查，而五十歲或以上的車長每年都會安排體檢。