政情：禁區上車 譚贛蘭封口
我哋前日報道過，勞工及福利局常任秘書長譚贛蘭嘅「AM13」政府座駕，喺中環砵甸乍街雙黃線禁區停車等候長達十多分鐘，而譚贛蘭仲要喺禁區上車。咁啱佢尋日出席社聯一個活動，我哋就梗係要問清楚佢啦，點知佢一概封口，乜都唔答，因為趕時間返政府總部開會喎。唔知佢嗰日喺禁區上車，又係咪趕住去開會呢？不過，無論理由幾充分都好，禁區停車等候同上落客都係違例嘅。
慨嘆現代家庭缺溝通
雖然譚贛蘭封口唔講禁區上車問題，但佢喺活動致詞時就大談細個嘅家庭生活，話自己出生於平凡、簡單嘅家庭，生活仲有啲似電影《歲月神偷》嘅環境，有時爸爸因工作關係，喺外面食完飯先返屋企，之後父母會閒話家常，幫佢睇功課，不時又會問吓佢返學時發生嘅趣事。
不過，佢話依家香港人就唔同喇，隨住經濟發展，市民變得生活緊張，同屋企人食飯可能係大時大節先會做嘅事，連溝通都係用網絡短訊，覺得呢種生活方式唔太真實，唔可以代替天倫之樂，所以籲港人要多啲同家人溝通。