中環出更：「夫妻團」遊俄 彭少衍回味王宮餐
充滿異國風情嘅俄羅斯一向係旅行聖地，日日忙住做生意嘅博愛醫院副主席兼衍生行老闆彭少衍，早前就同太太關麗雯（Carman）偷閒去俄羅斯玩足八日，團友仲有元朗潮州同鄉會主席黃元弟、副主席陳祥發及前元朗區議員馮彩玉等三對夫婦。原來彭少衍喺元朗發迹，又係潮州人，難怪同區內政商界人士咁老友。
彭少衍話，今次係佢首次踏足俄羅斯，未去之前已經對當地美麗嘅建築物及風景極嚮往。今次佢哋參加莫斯科及聖彼得堡豪華團，行程包括莫斯科紅牆、聖彼得堡凱旋門、克里姆林宮及有七百年歷史嘅聖巴素大教堂，仲有俄國史上功績最彪炳嘅女沙皇嘉芙蓮夏宮，認真大開眼界。去到俄羅斯，當然唔會錯過去睇馬戲啦！
端陽歎魚子醬香檳
彭少衍話，此行最難忘係端午節當日撞正俄羅斯國慶，團友們喺王宮歎超豪嘅魚子醬、飲香檳過節，夠晒特別。當佢哋喺王宮外見到一對盛裝打扮嘅男女，明知係賺遊客錢，都唔介意畀三百元盧布（約港幣七十元）影相，留下到此一遊嘅回憶。