跌完又跌，仆完再仆，政府民望持續向下，情況就好比有隻雀仔跌落水，有隻雀仔跌落街，點算好呢？計功夫茶話齋，若然本地官僚大腦麻痹，硬係唔見棺材唔流淚，今年七月一日確係要搵人抬棺材上街，等官老爺驚餐飽都好吖，見到棺材流完眼淚咪有機會痛定思痛囉！
港大民意研究計劃做過調查，中大亞太研究所又做過調查，兩者嘅結果大同小異，特首梁振英嘅評分都係錄得甚低嘅四十六點二分，即係不合格。港大嘅調查更加指出，CY民望淨值跌至負二十八，創出上台執政一年以來嘅任內新低。兩個調查分別發現，受訪者不滿以及不信政府嘅程度都上升到一個嶄新高度。
市民對政府最不滿嘅係乜嘢呢？中大探究民意嘅調查顯示，受訪者對於七個不同範疇嘅評分，包括房屋及規劃、政制及管治、經濟發展、民生及福利、醫療及衞生以及教育及環保，只有醫療及衞生同民生及福利表現差強人意，其餘全部肥佬，即係低過五十分。最低分嘅係教育及環保，只有四十二點八分。三成受訪者期望，政府未來一年優先處理房屋及規劃問題，其次係處理政治與管治。
簡單咁講，梁朝政府雖然自我感覺良好，認為執政一年以來房屋及規劃問題做得唔錯，不過呢一種自我感覺同市民意見存在非常大嘅落差。至於政治及管治咯喎，唔使多講啦，二○一七年普選特首嘅具體方案至今十畫未有一撇，你想市民滿意簡直難過香港足球隊贏得世界盃啦！
提到苦大仇深嘅房屋問題，普羅大眾真係一殼眼淚o架，家陣連專業人士都未必夠錢買樓，蝸居一族更加係苦不堪言，無力置業之餘又要受盡業主加租之痛。喂，劏房住戶所交嘅租金佔入息比例高達三成，租金每年平均加幅超過百分之十五，你叫收入微薄嘅草根階層點頂呀？唔好唔記得，全港貧窮人士多過一百萬，只要當中有百分之一嘅人由於心存怨懟而做出激烈行為，講緊嘅已經係一萬個火柴人，意思係一點即着，燒到火光熊熊嗰隻。
所以話啫，難怪有人估計今年七一遊行人數必定唔會少，原因係現屆政府交唔出功課，前朝曾蔭權政府留低嘅爛攤子，至今依然係尚未收拾殘局嘅爛攤子。就講教育及環保吖，國民教育被推翻已經夠瘀皮啦，環境局推出嘅擴建堆填區計劃又由於反對聲音太大而撤回，證明CY班子的而且確乏善足陳，一個二個唔打得又唔睇得。
正所謂恨鐵不成鋼，點樣先至能夠煉鋼成功呢？一字記之曰打，打鐵係煉鋼嘅必需手段，大家不妨將七一上街視作打鐵工程。