美國作家霍桑的名作《紅字》，那是一個「猩紅Ａ字母」的時代，凡是犯通姦罪者都必須佩戴這樣一種恥辱的標記，今天這個時代又回歸了！
在ＣＹ大吹大擂其一年「政績」報告的同時，消防處又把那恥辱的標記帶給大家。七十年代有一套電影《七十二家房客》，反映當年「劏房」居住的不堪，更反映當時社會時弊，其中一幕係咁嘅：發生火警之後消防員嚟到，唔係第一時間救火，而係揸住支水喉向房客唱歌仔：有水有水，冇水冇水，有水放水，冇水散水！
韶華易逝，人心不古。一個衰世的再現，通常都是先有人的墮落，然後禮崩樂壞，道德淪亡，所謂真理，都變成李逵手中的板斧。老朽之所以有如此感慨，皆因消防處不務正業，香港有咁多危樓、劏房嘅消防設施不足，佢哋唔多去巡視，反而因「接獲電郵投訴」，懷疑東方報業中心伺服器房的灑水系統沒有運作，要入內調查，擾攘一番後無所發現，就收隊離場！阿哥，玩嘢玩到咁小兒科，不丟人現眼嗎？特區政府之管治水平，一句話：認真垃圾！講真，消防處如此處理投訴，弱雞無知到令人髮指，有乜理由投訴內容連伺服器房嘅位置都欠奉，你哋卻可以未經調查、理解、核實，不知會東方而高調登堂入室搞搞震，三歲細路都睇到擺明係打擊新聞自由，製造白色恐怖啦！
消防處嗰位阿哥前言不對後語，所謂「投訴人」又諱莫如深，狡辯話只要涉及防火安全問題，都會「直接去了解咗先」，呢啲「語言偽術」確等而下之，呢啲廢話，就係廢柴高官的「良心」：勇敢做自己，胡說胡有理。唉！多少惡行假投訴之名而行之！對於東方集團嘅嚴正聲明，老朽極盼在上者「直接去反思及認衰咗先」，唔好一再用啲下三濫嘅橋段，無理滋擾正義傳媒，否則政府只會投射更多恥辱嘅標記！