政情：英國會睇十分鐘聆訊片段 醜聞遠播 貪湯佗衰港
前廉政專員「貪湯」湯顯明被揭連串貪腐醜聞，就連香港前宗主國英國都知道，事關正在英國嘅立法會會計界議員梁繼昌（Kenneth）尋日介紹貪湯早前「賴皮」回應議員提問嘅情況。貪湯「貪名遠播」，香港廉潔清譽真係畀佢一鋪清袋！
梁繼昌訪英主講
話說梁繼昌（Kenneth）同立法會議員葛珮帆早前應英國下議院邀請到訪英國，其中Kenneth尋日喺訪問行程即將結束前，以立法會政府帳目委員會委員身份擔任主講嘉賓，首先介紹立法會大樓內外景觀，之後有自製投映片，播出貪湯早前出席政府帳目委員會公開聆訊情況，仲播咗十分鐘咁耐添。
不過Kenneth席間對貪湯無加以批評，事關依家帳委會完成公開聆訊後仲未撰寫報告，所以佢不便對此加以評論。Kenneth雖無評論，但咁多話題都唔揀特別揀貪湯，當中都有價值判斷啦。
除此以外，據聞與會者對於香港特首同大部分問責局長都非政黨中人，都好有興趣。英國由保守黨同工黨交替上台執政，而香港無執政黨，對佢哋嚟講，當然係匪夷所思啦！