政情：船王大禮 感動鐵娘子
前排有解封文件披露，已故英國首相戴卓爾夫人曾與已故船王包玉剛就香港前途問題與會面，包玉剛長女包陪慶（Anna）尋日出席一個公開活動時再爆料，原來當年佢爸爸送咗一份大禮畀戴卓爾夫人，氹到戴卓爾夫人好開心，仲感動到差啲要送香吻回禮。
包玉剛女兒爆料
當年包玉剛同戴卓爾夫人會面前，提早送咗一份聖誕大禮。戴卓爾夫人初時拒收大禮，經包玉剛多次要求先肯拆禮物，點知一拆原來入面全部都係紙巾，裏面包住一條跳繩，氹到戴卓爾好開心，猛問點解。包玉剛解釋，自己每朝都會跳繩一百下，又話國家元首要保持健康，所以佢見到美國總統列根同教宗都會送對方一繩條，大家有繩一齊跳。
不過原來跳繩只係開場白，真正大禮在後頭。話說當年英國造船業漸式微，大批造船工人面臨失業，包玉剛係呢個時候雪中送炭通知戴卓爾夫人，佢已經向英國一間面臨結業嘅船廠買船。包玉剛好坦白，話英國船唔夠先進，而且從不準時交貨，講明今次交易注定蝕本，不過佢作為英國公民，應該要為國家略盡綿力。就係呢句說話，搞到戴卓爾夫人感動到差啲要送香吻回禮。